იტალიელი მზარეული ლონდონში

რესტორან Locanda Locatelli-ს შესასვლელში მუდმივად ირევიან პაპარაცები, რადგანაც იქ ძალიან ხშირად ვახშმობენ ვიპ პერსონები. ლონდონში  იტალიის პატარა კუნძულის მონახულების მსურველები იმდენად ბევრნი არიან, რომ ჰოლივუდის ვარსკვლავებიც კი რესტორანში ადგილს ჩასვლამდე 30 დღით ადრე ჯავშნიან.

Locanda Locatelli ცნობილ იტალიელ შეფ-მზარეულს, კულინარიული ბესთსელერების ავტორსა და სელებრითი შეფ-მზარეულს – ჯორჯო ლოკატელს ეკუთვნის, რომელმაც თავბრუდამხვევი კარიერის გაკეთება და მსოფლიოს საუკეთესო მზარეულთა შორის თავის დამკვიდრება მოახერხა.

ჯორჯო ლოკატელი იტალიის პატარა ქალაქ კორჟემოში დაიბადა, სადაც მის ოჯახს – ლოკატელის მზარეულთა დინასტიას რესტორანი La Cinzianella აქვს გახსნილი, რომელიც მიშელინის ვარსკვლავითაა დაჯილდოებული. ასე რომ, მსოფლიო გასტრონომიის მომავალი ვარსკვლავი სამზარეულოს ამბებში ბავშვობიდან იყო ჩახედული.

ოჯახურ რესტორანში პირველი გამოცდილების მიღების შემდეგ  იგი საფრანგეთში სტაჟირებაზე გაემგზავრა ჯერ კიდევ XVI საუკუნიდან ცნობილ, სამვარსკვლავიან პარიზულ რესტორანში  (La Tour d’Argent – ვერცხლის კოშკი).

შემდეგ ჯორჯო ლონდონში გადაბარგდა, სადაც ცოტა ხანი სასტუმრო Savoy-ს რესტორანში მუშაობდა, შემდეგ კი რესტორან Zafferano-ში გადავიდა, რომელმაც მისი წყალობით მიშელინის ვარსკვლავი მიიღო. ამის შემდეგ მან საკუთარი რესტორანი Locanda Locatelli გახსნა, რომელმაც ასევე სწრაფად მოიპოვა მიშელინის ვარსკვლავი.

გარდა ამისა, Locanda Locatelli-ს იტალიის ფარგლებს გარეთ საუკეთესო იტალიური რესტორნის ოფიციალური ტიტული აქვს. ამ რესტორნის მენიუ დაკომპლექტებულია „ბებოს რეცეპტებით“ და  თავისი ქვეყნის ხასიათისა და სულის გადმოცემას ცდილობს.

ლოკატელის რესტორნის მუდმივი მომხმარებლები არიან სტინგი, მადონა, ბრედ პიტი, პრინცი ჩარლზი, პოლ მაკარტნი, გვინეტ პელტროუ, ჯეიმი ოლივერი და სხვ.

ბევრი აქ ბავშვებით მოდის, რადგან მათთვის სპეციალური საბავშვო პორციები მზადდება. ამგვარად ჯორჯო ეწინააღმდეგება მის მთავარ კონკურენტსა და მოწინააღმდეგეს გორდონ რამზის, რომელიც მიიჩნევს, რომ „მაღალ სამზარეულოში“ ბავშვებს არაფერი ესაქმებათ.

Locanda Locatelli ჯორჯოს ერთადერთი რესტორანი არაა. მეორე – Locatelli’s Pizza ამერიკული ქალაქის ჰიუსტონის ახლოს მდებარეობს. კიდევ ერთი – Ronda Locatelli – კურორტ Atlantis The Palm-ზე მუშაობს და განლაგებულია The Palm Jumeirah-ზე –ფანტასტიკურ ხელოვნურ კუნძულზე დუბაიში.

ჯორჯო ლოკატელი ექსპერიმენტატორია. 2008 წელს მან პირველმა შეასრულა თავისი სახელგანთქმული თანამემამულის, პოეტ ავანგარდისტის ფილიპო ტომაზო მარინეტის პარადოქსული  იდეები, რომლებიც აღწერილი იყო წიგნში „ფუტურისტის სამზარეულო წიგნი“.

მარინეტის ინგრედიენტების კონკრეტული პროპორციების შესახებ არ დაუწერია, ასე რომ, შეფ-მზარეულ ჯორჯო ლოკატელის სრული თავისუფლება hქონდა – ფუტურისტული რეცეპტები მხოლოდ ზოგადი სახელმძღვანელოს როლს ასრულებდა. თუმცა კერძები სრულად შეესაბამებოდა ფუტურისტულ ესთეტიკას: მიხაკის არომატით გაჟღენთილ ოთახში, ვაგნერის ველური ჯაზის ჰანგებისა და აეროპლანის ძრავის ხმაურის თანხლებით, სტუმრები მიირთმევდნენ ზეთისხილსა და ფენხელს, გაწყობილს ქაღალდის, აბრეშუმისა და ხავერდის ნაჭრებით.

მზარეულობის გარდა ლოკატელს სახელი მისმა წიგნმაც „დამზადებულია იტალიაში“ გაუთქვა. წიგნში მოცემულია  ტრადიციული იტალიური რეცეპტების კრებული, ასევე ავტორის ნააზრევი კულინარიასა და კულინარიის როლზე მის ცხოვრებაში.

ერთდროულად სერიოზულად და ხუმრობით დაწერილი ეს წიგნი მოგვითხრობს იმის შესახებ, რომ იტალიური კულტურა არ არსებობს იტალიური სამზარეულოს გარეშე და პირიქით.